الموضوع شيّق… و على طول ممكن تبدأ تفكر بنفسك و معاك فلوس و مستمتع في حياتك…. لكن الموضوع ماهو بسيط… يحتاج منك جهد و وقت كثير حتى تبني بالأول المهارات اللي تحتاجها لتتميز في هذا العمل… حاله من حال اي عمل اخر… فاذا كنت مستعد انك تبذل كل ماعندك من وقت و جهد… خلك معاي و بشاركك افكار اساسية و مهمة.
افضل مكان تبدأ منه هو انك تعرف شنو المهارات اللي عندك اياها و تتميز فيها…. ممكن تقول كيف اعرف المهارات اللي اتميز فيها؟…. في هذي الحالة افضل شي انك تستكشف و تجرب كل شي لما تلقى اللي يناسبك… حتى تبدع فيه…. بشكل عام لازم تكون مهارتك متعلقة بالكمبيوتر او احد الاجهزة الالكترونية الاخرى…. هذي راح تفتح لك ابواب كثيرة.. وهي اللي عليها ضغط و شغل كبير في زمننا الحالي… لكن يأتي السؤال.. لأي درجة حاب تتعمق بالكمبيوتر؟
ممكن تكون من النوع اللي مايحب يتعمق وايد بالكمبيوتر… فمثلاً تكون عندك مهارات فنية مثل الرسم ولا التصوير او التطريز… و فقط تبي انك تسجل في احد المواقع المشهورة و تبيع منتجاتك…. يعني انت تصنع… و تستفيد من الخدمات اللي يقدمها الموقع…. مثل etsy – shutterstock
او انك تكون من النوع اللي يحب يتعمق بالكمبيوتر و هذي افضل شي ممكن تسويه…. لان فعلاً مجالات الابداع و الفرص مالها حدود… مثل البرمجة (بافرعها المتعددة) و التصميم…. وهذا اللي اعتدنا عليهم… لكن في شي ثاني… ممكن نطبقه على نفس المهارات اللي ذكرناها فوق…. بدل ما تكون مصور ولا رسام ولا تحب التطريز… و فقط تعرض منتجاتك بمواقع…. انت ليش تسوي جذي؟ لانك تبحث عن زوار و زبائن يشوفون منتجاتك… فليش ما انت تحاول تجذب زبائنك لي عندك؟ كيف؟
هني المشكلة… لانك راح تضطر تسوي كل شي يسوونه هذي المواقع بنفسك… مو سهل ابداً… لكن اذا عرفت الوصفة السحرية…خلاص راح تصير مستقل بذاتك و تعرف كيف تجذب زبائنك لي عندك… هذا هو السر للتميز في عملك المنزلي… و تقدر تطبقه على كل انواع المهارات اللي تخطر في بالك… سواء كانت مهارتك في برمجة العاب الكمبيوتر ولا طبخ صحي ولا تدريب رياضة مخصصة مثل السباحة ولا عن طرق تطريز الملابس بالمنزل ولا عن طرق كتابة ابحاث الجامعة… افكار مالها نهاية… لكن الطريقة نفسها… عندك فكرة… اجمع ناس عندك… كيف؟ هذي اللي راح نفصل فيها اكثر في الاسفل👇
تخيل معاي لو كان عندك مشغل او محل في مجمع… كيف راح تحصل زبائن؟ بشكل عام بطريقتين…. اما من الناس اللي يمرون على محلك و يجذبهم شغلك و يدخلون و يصيرون زبائن…. او عن طريق المعارف لما يكون عندك زبائن وهم يبلغون اصدقائهم و اهلهم عنك و يبدؤون يصيرون زبائن جدد لك
كيف ممكن نطبق هذي الطريقة على عملنا المنزلي؟ لازم نبحث عن الناس… وين ممكن نحصلهم؟…. ايضا بشكل عام ممكن تحصلهم في طريقتين…. الاولى في جوجل… و هذا اللي تحصل فيه عدد كبير جداً من الناس…. لما تكون الناس تبحث عن “كيف اصمم موقعي الخاص”…. و انت تطلع لهم في بحث جوجل… هني هم راح يعرفونك و يدخلون محلك “اللي اهو موقعك الالكتروني” و اذا عجبهم شغلك يصيرون زبائن لك…. لكن بالتأكيد الطريقة ماهي بسيطة و تحتاج نتعلم عليها… بشكل مختصر تحتاج تعرف كيف يكون عندك موقع او بلوق “BLOG” تصميمه حلو لكن اهم شي يكون محبوب من جوجل… لان جوجل فعلاً ممكن يفضل موقع على موقع اخر… كله بسبب شي اسمه “جوجل SEO”…تعلم اكثر عنه 👍
الطريقة الثانية هي عن طريق وسائل التواصل الاجتماعي… بشتى انواعها… تويتر و انستجرام و يوتيوب و سناب تشات و تيك توك…. شوف شنو اللي يناسبك و حاول تركز على واحد منهم… و تعلم كيف تقوي نفسك فيه و توصل كلامك و افكارك و شغلك لاكبر عدد من الناس… و تفاعل معهم… حتى تكبر شريحة المتابعين عندك… لكن اهم شي ابتعد عن شراء المتابعين و غيرها من هذي الاساليب المنتشرة لانها راح تدمر حسابك و يصير يوتيوب ولا انستجرام مايعطيك اي اعتبار ولا يطلعك للناس… اقرأ اكثر عن “التسويق في وسائل التواصل الاجتماعي” او “social media marketing”.
اهم شي ركز على انك تتعلم وخصوصا في البداية… لا تطمح للربح السريع لانه مو واقعي ابداً… العملية تحتاج وقت و صبر… الموضع يحتاج التزام لكن بنفس الوقت تذكر ان مهارتك وهوايتك الخاصة مثل التطريز او التصوير او التصميم هذي حلوه ولكنها خاصة فيك انت… اذا تبي توصلها لاكبر شريحة ممكنة من الناس فلازم تدعم هذي المهارات بمهارات اخرى مثل التسويق و اهم شي طرق واساليب البيع و التفاوض و تنظيم الوقت وغيرها… جذي راح توصل باذن الله و تتميز عن غيرك… بالتوفيق يارب
🔵شاركني في التعليقات🔵
برأيك ليش الكثير من الناس ما يستفيد من مهاراته؟؟