تتردد هذي الجملة على لسان الكثير من الشباب
السؤال هو ليش نربط الدراسة بالتعب و الشقاء؟
قد يكون شي تعودنا عليه لكن لازم نسعى و نغيره… ابدأ اول شي بتغيير المسمى من دراسة الى شغل… لا تقول بروح ادرس ولكن قول بروح اشتغل… هذا التغيير ولو كان بسيط فله تأثير كبير على نفسيتك…اعتبرها مثل الوظيفة تروح تشتغل لفترة محددة وتخلص…لكن المشكلة الاساسية انك انت بتكون المسؤول عن تحديد وادارة وقت هذا الشغل…فحاول تبدأ بتدرج و تلتزم بجدول دراسي يناسب نظام حياتك… الى ان تتكون عندك عادة و تصير ملتزم بهذا الروتين اليومي… ومن تجربتي الشخصية فهذا الاسلوب جداً مفيد و ناجح و بتشوف فرق في طريقة تعاملك مع الدراسة…
مهم جداً انك تعتبر الدراسة كأنها شغل… لان في واقع الحياة كل الناس لازم تشتغل حتى لو كان الشغل متعب…. فليش نخاف من تعب الدراسة و نخليه عائق يبعدنا عن اهدافنا…. ابدأ في تغيير مسمى الدراسة الى شغل حتى تكون متجهز نفسياً واتبع الخطوات في الاسفل:
اول شي تبدأ فيه هو انك تخصص ست ايام من الاسبوع للدراسة..او…🔺الشغل🔺…. و يوم واحد فقط للراحة… بحيث يكون يوم كامل تكون بعيد جداً عن جو الشغل
بعدها ابدأ بتدرج و خطط ايام الشغل و ابدأ في الامور اللي تحبها اولاً
مثلاً عندك نادي ثلاث ايام في الاسبوع… و عندك يمعة مع الاصدقاء ثلاث ايام في الاسبوع و يمعة العائلة يومين في الاسبوع….
بعدها ضيف الاساسيات مثلاً المحاضرات عندك خمس ايام في الاسبوع
وبعدها عبي الفراغات و الوقت المتبقي عندك في جدولك باوقات مخصصة للشغل
فيكون جدولك كالاتي:
▫️الاحد الى الخميس
محاضرات… و بينهم تروح المكتبة و تشتغل.. و بعد المحاضرات تتغدى و ترجع المكتبة و تجلس لي الساعه ٣ او ٤ و بعدها ترجع للبيت…احرص انك عالاقل اشتغلت ساعتين او ٣ ساعات كل يوم غير محاضراتك….. وبعدها اما تروح للنادي او تجتمع مع اصحابك….لازم تحط في بالك ان وقت الدراسة مو طول اليوم… لكنه وقت محدد بتخلص فيه مهمتك و بعدها بيكون عندك نشاط ممتع سواء في النادي او مع اصحابك…. وهذا انجازك اليومي
▫️الجمعه…. يكون يوم الراحه و اجتماع العائلة مثلاً ولا تفكر ابداً بالشغل
▫️السبت…..اخذ منه ثلاث او اربع ساعات شغل و تكون في المكتبة… من الساعه ١٠ الصبح لي الساعه ٢الظهر… وضروري يكون لك بعدها نشاط ممتع ترفه فيه عن نفسك
وجذي تكون ختمت اسبوعك بانضباط و انجاز في الشغل…. و بتشعر بسعادة كبيرة بسبب هذا النجاح اللي يحسب لك
🔺ملاحظة: اكيد بتشوف نفسك اول الايام ما تقدر تقعد ساعتين او اربع ساعات كل يوم وتشتغل…. مو مشكلة ولا تقسى على نفسك… خلها في البداية نصف ساعه كل يوم…. بشرط انك تلتزم فيها و تقعد في المكتبة… وخل اول عشر دقايق تلهى بالسوالف ولا بالتلفون او اليوتيوب… لكن بعدها عندك عشرين دقيقة حاول انك تسوي شي فيها… و خل التلفون في الشنطة و خله مغلق … التزم في النصف ساعه لمدة اسبوع وبعدها خلها ساعه كل يوم و زيدها تدريجيا…. وجذي بتكون عادة و جزء من روتينك اليومي… و يصير يومك متوازن… جربها و بتشوف كيف بتتغير نظرتك للدراسه
🔵شاركني رأيك🔵
ليش دائماً نربط الدراسة بالشقاء و التعب؟ هل بسبب طريقة تعاملنا معاها؟
انا ماقدر اردس ويوم ادرس ماافهم ش الحل ماعرف