كم مره تعلمت شي جديد و حاولت بكل جهدك انك تعلم اهلك و اصحابك لانك تبي تفيدهم و تغيرهم لان ودك تشعر بالسعاده لانك غيرت شخص… واكيد كنت تنصدم من ردود الافعال لما ما يهتمون وايد باللي تقوله لهم لانه غالباً موضوع مو لهم ولا عندهم اهتمام فيه…
لكن انت تصر انك تعلمهم و تحاول بكل جهدك انك تغير افكارهم… الى ان تكتشف انك تحبطت و مافي احد يسمع كلامك… انت ودك تفيد الناس بس للاسف بعض الناس ماتبي تتعلم منك… وهذا يدخلك في دائرة احباط و اخرتها تكتشف ان انت بنفسك رجعت لما كنت عليه وماقمت تطبق اللي تعلمته.
اسمع مني…. مو لازم تعلم كل الناس…. ولا تعطي كل معلوماتك لكل الناس… لان مو كلهم بيقدرون اللي تقوله… عطهم بس على قد سؤالهم و لا تزيد و تتعمق… وعلمهم كيف يبحثون بنفسهم عن المعلومة… لانه اذا الشخص ما وده يتعلم من الداخل و يضيع وقته في البحث عن المعلومه فهو ماراح يكون عنده تقدير المعلومة ولا للجهد اللي بذلته انت عشان توصل لها.
خلك مثل البذره اول حياتها تكون مختبئة في مكان دافئ تحت الارض ولا احد يدري عنها… الى ان تتقوى وتكبر و تصير قادرة على مواجهة العالم الخارجي فبعدها تنبت و تخرج للعالم.
كلنا ودنا نفيد كل الناس… لكن انت انسان و لك قدرات… خصوصا اذا كنت في بداية الطريق للنجاح
ماتقدر تسوي مهمتين في نفس الوقت… تعلم الناس … و تواجه الناس و ترد عليهم…. نصيحتي لك… اذا بتنصح… ركز فقط على الناس الايجابيين.. هذوله اللي اسعى انك تعلمهم و تتعلم منهم لانهم بيتقبلون منك… لا وبعد انت بتحس في ايجابية وسعادة.
وابتعد عن السلبيين و لا تبذل كل جهدك في اقناعهم.. خصوصا اذا في هذه المرحلة الحرجة لانك تبي كل طاقتك تكون موجهة في انها تغيرك انت بالاول… نعم… تأكد انك تغيرت انت بالاول و عرفت طريق النجاح و بعدها تعلم كيف تواجه الناس و تجادلهم اذا حبيت… والمشكلة انك عشان تغير من نفسك تحتاج وقت طويل جداً فلازم تصبر على ترك الجدل و النقاشات الطويله… احسن نصيحة سمعتها انا شخصيا هي اني اسكت و اتعلم بنفسي ولا لي شغل في احد غير نفسي… مبدئياً…. الا ان اوصل لمرحلة احس فيها بثقة بهذا التغيير وبعدها ممكن اخرج للعالم و اواجه الناس و اعلمهم و اقنعهم.
لكن اذا استعجلت وواجهت وجادلت وانت للحين ما تغيرت صح… فبتشوف نفسك كيف بتكون محبط و كسول و فوق هذا بتترك اللي تعلمته و ترجع لنقطة الصفر…
🔵شاركني في الكومنت🔵
كم مره صارت فيك انك تحاول تنصح اللي حولك و تحس انهم يردّونك و يحبطونك؟